Sontga Frena, purschala e martra.
pdf: cheu l’entira historia
Ils 1 da settember: Sontga Frena, purschala e martra
Sontga Frena che fuva parenza da sogn Murezi e nativa da Thebea en Egipta, ei naschida ord nobla famiglia. Bein instruida en la ductrina dalla sontga cardientscha, veva ella il desideri da visitar ils loghens sogns dall’Europa e da vegnir marterisada per amur da Diu. Cun sogn Murezi eis ella vegnida sur mar tochen en l’talia. Leu banduna ella sogn Murezi e camina tras plirs marcaus per survir als cristians persequitai. Finalmein contonscha Frena Milaun, nua ch’ella seferma e segida per enzacons onns culs perschuniers. Cheu survegn sontga Frena las novas che sogn Murezi e ses cumpogns seigien vegni marterisai a Martenah el Valleis. Per reverir ils corps da quels sogns marters e per anflar la caschun da dar la veta per amur da Diu, va ella a Martenah. Mo ils gedius han buca schau tier ch’ella surveschi a Diu e perquei eis ella ida viers Soloturna. En ina grotta ha ella anflau quartier e vivida leu cun survir a Diu. Per surviver e buca dar mulesta als auters, fageva ella pintgas lavurs e deva quellas ad ina buna dunna per schar vender. Sontga Frena che veva il dun da scatschar demunis e da dar la vesida als tschocs e l’udida als suords, vegneva visitada da bia glieud che seconverteva lu. Per impedir quei bien, ha il demuni instigau il guvernatur Hirtacus da persequitar la sontga purschala e metter ella en perschun. En oraziuns serecamonda ella alla divina protecziun e selegra d’astgar murir per amur da Diu. In di cumpara sogn Murezi e di da buca temer il tiran, pertgei il Segner seigi cun ella! Frena roga sogn Murezi da seregurdar dad ella avon il tron da Diu. Denton vegn Hirtacus schi malsauns che negin saveva gidar el. Perquei lai el clamar Frena. La sontga ura per siu grond inimitg ed el daventa sauns. Hirtacus dat sinquei a Frena la libertad ed ella astga puspei turnar anavos en sia grotta. Biaras giuvnas vegnevan ussa neutier per schar instruir e survir a Diu. Cun ina miracla ha Diu duront il temps da gronda fomaz dau d’enconuscher ad ellas ch’el banduni buca ils gests che sefidan dad el. Per che la glieud venereschi buca ella, ei Frena seretratga a Koblenz. Era cheu medegava ella nundumbreivels malsauns. Il grond pievel vess puspei saviu caschunar ad ella honur e vanagloria. Da quei seretila Frena e va a Zurzach. Leu anfla ella suttetg tier in augsegner e daventa schizun sia guvernanta ed administratura. Mo cheu han nauschas buccas fatg ord ella ina sfarlatadra, pertgei Frena fuva fetg generusa culs paupers e malsauns. Il demuni odiava la sontga casarina ed empruava adina puspei da metter ella en schliet num. Per buca esser ina spina els egls dil fauls e scuiu mund, ha sontga Frena dau si quei survetsch e seretratga leu el contuorn en ina hetta da siu persei. Cheu ha ella surviu a Diu entuorn 11 ons cun far miraclas e medegar la glieud da mals e mendas. Suenter eis ella vegnida malsauna. Duront ch’ella serecumandava a Diu e spitgava cun legherment la davosa ura, ei Nossadunna cumparida ad ella en cumpignia dils aunghels e da sontgas purschalas ed envidau ella tier Cristus allas nozzas perpetnas. Era sche Frena ha giu ina beada mort, sa ella esser encorunada cun la cruna dil marteri, pertgei sia veta ei stada tras a tras in suffrir per Diu. Sontga Frena ei vivida entuorn ils onns 300 e sia fiasta vegn tenida a Constanza igl emprem da settember.